Бишек җырлары

Бишек җырлары- дөньядагы иң татлы, иң ләззәтле җырлар ул. Чөнки без бишектә ятканда ук ул җырларны ишетеп, күңелебезгә сеңдереп үсәбез. Әнкәбезнең ягымлы тавышы белән халкыбызның милли моңнары безнең күңелләребезне эретә. Бишек җырлары һәркемгә кадерле, чөнки алар балачакны хәтерләтә. 
Бишек җырларының төп вазифасы- бишек тирбәтү, баланы йоклату, тынычландыру.

 Бу җырлар ни өчен бишек җырлары дип атала соң? Бу да безнең тарихыбызга барып тоташа. Борынгы бабаларыбыз яңа туган сабыйны тирбәтү өчен махсус җайланма уйлап тапканнар .Ул “бишек” дип аталган. 

Ә аларның ниндиләре генә булмаган! Нечкә тал чыбыгыннан үрелгәннәре дә,агачны уеп ясалганнары да, тактада сырлап эшләнгәннәре дә... Биредә горур, уңган әтиләребезнең,газиз бабаларыбызның матурлык белән бергә үрелгән өметләре, һөнәргә осталыклары,рухи дөньлары чагыла.

 Бәлли-бәү, кызым, күктә ай калка,

Йокла, йом күзең, шаярып ятма.

Бәлли-бәү, бәлли-бәү.

Йокла, йом күзең, шаярып ятма.

Урамнар тынган, җилләр туктаган,

Күрше бала да ятып йоклаган.

Бәлли-бәү, бәлли-бәү,

Күрше бала да ятып йоклаган.

Сөйгән курчагың ял итә күптән,

Аю, филләрең урманга киткән.

Бәлли-бәү, бәлли-бәү,

Аю, филләрең урманга киткән.

Йомшак мендәрдә йокла, йом күзең,

Рәхәтләнеп син ял ит төн озын.

Бәлли-бәү, бәлли-бәү,

Рәхәтләнеп син ял ит төн озын.

Бәлли-бәү, бәлли-бәү, бәлли-бәү…

Источник: http://erlar.ru/node/771